Ҳукумат ва Жаҳон банки гуруҳи, Abu Dhabi Future Energy Company PJSC (Масдар) 250 мегаватт (МВт) қуёш фотоэлектр станциясини ва 63 МВт қувватга эга энергия сақлаш тизимини (BESS) молиялаштириш учун кредит шартномалари пакетини имзолади.Мазкур лойиҳанинг амалга оширилиши натижасида 75 мингга яқин хонадон тоза электр энергиясидан фойдаланиш имкониятига эга бўлади.
Қайд этилишича, бу Марказий Осиёда қайта тикланадиган энергетика соҳасидаги биринчи бундай ташаббусдир, чунки янги қуёш электр станцияси инфратузилмасига электр энергиясини сақлаш тизими интеграция қилинади. Бу энергия тизимининг самарадорлиги ва мослашувчанлигини оширади, электр таъминоти хавфсизлигини таъминлайди ва қайта тикланадиган энергия ишлаб чиқаришдаги узилишларни камайтиради.
Лойиҳанинг молиявий пакетига Жаҳон банки гуруҳига кирувчи Халқаро молия корпорацияси (IFC) томонидан тақдим этилган 53 миллион доллар миқдоридаги кредит, шунингдек, Осиё тараққиёт банки (ОТБ), Нидерландия (FMO) ва Япония халқаро ҳамкорлик агентлиги (JICA) томонидан тақдим этилган 106 миллион доллар миқдоридаги кредитлар киради.
Бухоро вилоятининг Олот туманида барпо этиладиган бўлажак қуёш электр станцияси йилига 585 гигаватт-соатдан ортиқ қайта тикланадиган энергия ишлаб чиқариш имкониятига эга бўлиши режалаштирилган. Унинг фаолияти йилига 327 000 метрик тоннадан ортиқ иссиқхона газлари чиқиндиларини камайтиради.
“Янги қуёш электр станцияси ва электр энергиясини сақлаш тизимининг ишга туширилиши мамлакат энергия балансида қайта тикланадиган энергия манбаларининг улушини оширади. Бундан ташқари, заводнинг ишлаши мавжуд электр тармоқларини барқарорлаштириш ва фаолиятини яхшилашга ёрдам беради ва шу орқали иқлим ўзгаришига қарши кураш бўйича халқаро саъй-ҳаракатларга ҳисса қўшади”, — деди IFC Туркия ва Марказий Осиё бўйича директори Вибке Шлёмер.
Лойиҳа “Ўзбекистон миллий электр тармоқлари” акциядорлик жамиятини икки томонлама электр энергиясини харид қилиш шартномаси бўйича 25 йил муддатга электр энергияси билан таъминлаш мажбуриятини олган “Nur Bukhara Solar” масъулияти чекланган жамияти томонидан амалга оширилади, шунингдек, 10 йил давомида электр энергиясини сақлаш тизимини ишлатиш мажбуриятларини ҳам ўз ичига олади.