Аввалроқ, ижтимоий тармоқда Самарқандда котлован қазилаётганда қўшнининг уйи қулаб тушгани акс этган видео тарқалди. Ҳолат юзасидан UzNews.uz'га Бош прокуратура маълумот берди.
Иш ҳужжатларга кўра, қулаган уйнинг эгаси Ҳасан Мурадуллаев ҳодисадан бир кун ўтиб, Пастдарғом тумани ИИБга қўшнисининг устидан ариза билан мурожаат қилган.
Мурожаатга кўра, Ҳасан Мурадуллаев Пастдарғом тумани "Самарқанд" маҳалласи Самарқанд кўчасидаги уйи билан бир девор қўшниси Т.Бегматов ҳовлисида дўкон қуриш учун (чуқур) котлован қазилганлигини сабабли ўзи ва МФЙ раиси билан қурувчиларга котлован қазишни тўхтатишини сўраган. Аммо, қўшниси қазишдан тўхтамаган.
Натижада, 14 май куни соат 19:45 ларда Ҳасан Мурадуллаевнинг яшаш хонадони қулаб тушган. Мурадуллаевнинг билдиришича, унга 300 минг АҚШ доллари миқдорида моддий зарар етган.
Ҳозирда тўпланган ҳужжатлар юзасидан Пастдарғом туман ИИБ ҳузуридаги Тергов бўлими томонидан ЖКнинг 173-моддаси (мулкни қасддан нобуд қилиш ва унга зарар етказиш) 2-қисми “в” банди билан жиноят иши қўзғатилиб, дастлабки тергов ҳаракатлари олиб борилмоқда.
