Тошкентда мактаб ўқувчилари синфда қарта ўйнагани акс этган видео ижтимоий тармоқларга сиздирилди. Ушбу ҳолат юзасидан Тошкент шаҳар мактабгача ва мактаб таълими бошқармаси муносабат билдирди.
Аниқланишича, ҳолат жорий йилнинг 23 апрель куни Юнусобод туманидаги 235-сонли умумтаълим мактабида 8-"Б" синф ўқувчилари томонидан тарих фани дарси чоғида содир этилган. Дарс жараёнига халақит қилиб, "қартабозлик" қилган тўрт нафар ўқувчи ва уларнинг ота-оналари мактабга чақиртирилиб, Миллий гвардия, ИИБ ходимлари, психолог ҳамда мактаб маъмурияти иштирокида профилактик тушунтириш ишлари олиб борилган.
Ўқувчиларнинг ота-оналарига МЖтКнинг 47-моддасига асосан жарима қўлланилди. 8-"Б" синф раҳбари Н.Б.га нисбатан интизомий чора кўрилди.