Сурхондарёдаги бозорларнинг бирида олибсотар савдогар ўз ҳамкасбини пичоқлаб, ўлдирган. «Миллар» дастурининг хабарига кўра, мазкур ҳолат 2023 йилнинг 15 октябрь куни соат 05:30 атрофида содир бўлган.
Маълум қилинишича, жиноятчи ва жабрланувчи мунтазам равишда жой талашиб келган. Натижада уларнинг жанжали мева савдоси билан шуғулланган жабрланувчининг воқеа жойида вафот этиши билан якунланган.
Ушбу ҳолат юзасидан суд иши ЖИБ Термиз шаҳар судида кўриб чиқилди.
"Қасддан ўлдириш ниятим йўқ эди, онамни сўккани учун мажбур бўлдим. Бу ишларни ҳеч қачон такрорламайман. Оила аъзоларидан кечирим сўрайман",- дейди судланувчи.
Судланувчи ЖКнинг 97-моддаси 2-қисмининг «Ж» ва «л» бандларида назарда тутилган жиноятни содир этганликда айбли деб топилиб, унга нисбатан 17 йил муддатга озодликдан маҳрум қилиш жазоси тайинланди.
