Жорий йилнинг 4 март куни соат 15:40 атрофида Қорақалпоғистон Республикаси Тахтакўпир тумани Даўир маҳалласида жойлашган 4-сонли мактабга ушбу туманда яшовчи 45 ёшли фуқаро маст ҳолда мактаб ичкарисига киришга уринган. Мактаб қоровули бегоналарни мактаб ичкарисига киритмаслиги тўғрисида огоҳлантиришига қарамасдан, маст эркак жанжал кўтариб, курткаси ичидан болта чиқарган. Ҳодиса жойига Миллий гвардиянинг тезкор ҳаракатланувчи гуруҳ экипажи етиб борган.
Ўрганишлар давомида ушбу фуқаро, мазкур мактабда бошланғич синф ўқитувчиси бўлиб ишлайдиган турмуш ўртоғи Р.Б.ни кўришга келгани ва гаплашиб кетмоқчи эканлигини, қўлидаги болтани эса ўтин чопиш олдидан ўткирлатишга олиб чиққанлигини билдирган.
Фуқаро С.Д. тезкор гуруҳ ходимлари томонидан туман Тиббиёт бўлимига олиб борилиб, спиртли ичимлик истеъмол қилганлиги бўйича маълумот олинган. Шундан сўнг, унга нисбатан туман ИИБ профилактика инспектори билан бирга тегишли ҳужжатлар расмийлаштирилган ҳолда, туман тиббиёт бирлашмасига қарашли мастлик ҳолати бўлган шахсларга тиббий ёрдам кўрсатиш пунктига ётқизилган.