Ижтимоий тармоқларда Тошкент кўчаларидаги ноқонуний қурилган бинолар бузилаётгани ҳақида кўплаб видеолар тарқалди. Тошкент шаҳар ҳокимлиги ҳолат юзасидан баёнот берди.
Қайд этилишичa, жойларда пиёдалар учун мўлжалланган йўлларнинг қулайлиги таҳлил қилинган. Эътиборни тартибсиз, ягона услубсиз ва кўп ҳолларда тегишли шаҳар хизматлари томонидан бериладиган рухсатномаларсиз қурилган бинолар тортган.
"Йўллар бўйлаб жойлашган бу бинолар аҳоли учун хавф туғдиради, масалан, уларнинг аксариятида тўхташ жойлари ва йўлаклари йўқ, улар пиёдалар йўлакларига чиқиб кетган тарзда ташкил этилган. Шундай қилиб, ҳайдовчининг бир дақиқалик харид қилиш жараёни бошқа ҳайдовчилар учун ҳам, пиёдалар учун ҳам сезиларли ноқулайлик ва хавф туғдиради", - дейилади хабарда.
Хабарга кўра, айни пайтда таҳлил натижалари асосида тегишли шаҳар хизматлари томонидан ноқонуний қурилма ва иншоотларни демонтаж қилиш ишлари бошланмоқда.
Ўз навбатида, пойтахт ҳокимлиги Тошкент шаҳри ҳудудида маиший ва тижорат биноларига эга бўлган пойтахт аҳолисини ҳужжатларнинг шаҳарсозлик меъёрларига мувофиқлигини яна бир бор синчиклаб текширишга чақирмоқда.
"Тадбиркорлар ва шаҳар аҳолисини ушбу турдаги кўчмас мулкни харид қилишда эҳтиёткор бўлишга, юридик хизматлар билан маслаҳатлашишга чақириш зарур, деб ҳисоблаймиз. Тошкент шаҳар кадастр хизматлари томонидан бериладиган, уларнинг чегаралари, майдони ва биноларнинг турларини тасдиқловчи ҳужжатлардан ташқари, бино ва иншоотлар учун ҳужжатларнинг муқобил турлари мавжуд эмас.
Потенциал хариднинг барча тафсилотларини аниқлаштириш учун ваколатли органларга шахсан ёки онлайн давлат хизматлари орқали мурожаат қилинг. Ҳурматли пойтахт аҳолиси! Фақат ишончли ва расмий маълумот манбаларига ишонч билдиринг, аниқ маълумот учун 71 210-01-63 телефон рақами ёки ижтимоий тармоқлар орқали пойтахт ҳокимлиги матбуот хизматига мурожаат қилинг", - дейилади хабарда.