2024 йил Бугун, 18 январь куни бўлиб ўтган Олий Мажлис Сенати Кенгашининг навбатдаги мажлисида Сенатнинг қирқ тўққизинчи ялпи мажлисини 2024 йил 19 январь куни чақириш тўғрисида қарор қабул қилинди. Бу ҳақда Сенат Матбуот хизмати хабар берди.
Таъкидланганидек, видеоконференцалоқа тизимидан фойдаланган ҳолда ўтказиладиган ялпи мажлисда қатор масалаларни муҳокама қилиш назарда тутилган.
“Янги таҳрирдаги Ўзбекистон Конституцияси қабул қилинганлиги муносабати билан айрим қонун ҳужжатларига Олий Мажлисининг фаолиятини такомиллаштиришга қаратилган ўзгартириш ва қўшимчалар киритиш тўғрисида”ги ҳамда “Айрим қонун ҳужжатларига жиноятчиликка қарши курашиш бўйича фаолиятнинг ҳуқуқий асосларини такомиллаштиришга қаратилган қўшимча ва ўзгартиришлар киритиш тўғрисида”ги қонунлар шулар жумласидандир.
Шунингдек, ялпи мажлисда сенаторлар томонидан “Айрим тоифадаги жиноий қилмишлар учун жавобгарлик либераллаштирилиши муносабати билан Жиноят кодексига ҳамда Маъмурий жавобгарлик тўғрисидаги кодексига ўзгартириш ва қўшимчалар киритиш ҳақида”ги ва “Маъмурий жавобгарлик тўғрисидаги кодексининг 248-моддасига қўшимчалар киритиш ҳақида”ги қонунлар муҳокама қилинади.
Бундан ташқари, “Қайта тикланувчи энергия манбаларидан фойдаланиш янада ривожлантирилиши муносабати билан айрим қонун ҳужжатларига қўшимча ва ўзгартиришлар киритиш тўғрисида”ги, “Божхона кодексига божхона тартиб-таомилларини янада такомиллаштиришга қаратилган ўзгартириш ва қўшимчалар киритиш тўғрисида”ги, “Айрим қонун ҳужжатларига миллий қонунчилигини Жаҳон савдо ташкилоти битимларига мувофиқлаштиришни назарда тутувчи ўзгартириш ва қўшимчалар киритиш тўғрисида”ги қонунларни ҳам кўриб чиқиш режалаштирилмоқда.
Шу билан бирга, “Айрим қонун ҳужжатларига ўзгартиришлар киритиш тўғрисида”ги, “Ўзбекистон билан Эрон ўртасида маҳкумларни топшириш тўғрисидаги Шартномани (Теҳрон, 2023 йил 18 июнь) ратификация қилиш ҳақида”ги, “Ўзбекистон билан Вьетнам ўртасида жиноий ишлар бўйича ўзаро ҳуқуқий ёрдам тўғрисидаги Шартномани (Ханой, 2022 йил 14 ноябрь) ратификация қилиш ҳақида”ги қонунлар ҳам муҳокама қилинади.