Аввалроқ, UzAutoMotors компанияси оммабоп автомобиллар учун контрактация очилишини ва уни фақат онлайн олиш мумкинлиги ҳақида эълон берди. Аммо, айтилган санада савдо платформалари ишламай қолди. Ҳолат ижтимоий тармоқда кенг муҳокамаларга сабаб бўлди.
Компаниянинг хабар беришича, 22 декабрь соат 12:00 да оммабоп автомобилларнинг 2024 йилги бутун ишлаб чиқариш режаси учун онлайн контрактация бошланиши ҳақида маълум қилинди. Шу билан бир қаторда, UzAutoSavdo тизимида соат 10:00 дан бошлаб қатор ташқи таъсирлар кузатилди ва бунинг натижасида тизимга мурожаатлар сони 1 сонияда 50 000 – 60 000 га етди.
"UzAutoSavdo тизимига автомобиллар учун контрактация бошлангандан сўнг қилинган давомли киберҳужумлар, авторизация сўровларини қайта ишлашда муаммоларни юзага келтирди. Бу ўз навбатида, онлайн савдо тизимининг тўлиқ блокланишига олиб келди.
Онлайн шартномаларни расмийлаштириш жараёнида иштирок этадиган бир қатор тизимлар ишламай қолган пайтдан бошлаб, UzAutoMotors ва тегишли тузилмалар мутахассислари томонидан UzAutoSavdo тизимидаги носозликларни бартараф этиш ва ишлашини таъминлаш бўйича техник ишлар амалга оширилди", - дейилади хабарда.
Маълум қилинишича, савдо тизимини қайта тиклаш ишлари якунланди. Контрактация учун Chevrolet Cobalt, Damas ва Labo автомобилларининг режалаштирилган бутун ҳажми сотувда мавжуд бўлади. Шу билан бирга, қолган бошқа автомобиль моделлари учун контрактация доимгидек тартибда амалга оширилади.
Оммабоп автомобиллар учун онлайн контрактация бугун, 25 декабрь куни соат 14:00 да очилади. Эътибор қаратинг, тизим хавфсизлигини таъминлаш учун онлайн контрактация фақат savdo.uzavtosanoat.uz сайти орқали амалга оширилади.