Ўзгидромет хабарига кўра, бугун 22 декабрь ва 23-24 декабрь кунлари Ўзбекистон ҳудудига жанубдан илиқ ҳаво кириб келиши давом этади ва ҳарорат кўтарилади.
Бугун куннинг иккинчи ярмида ҳаво +8...+13 даража илиқ, шанба ва якшанба кунлари эса +12...+17 даража илиқ бўлади. Кечалари ҳам ҳаво илиқ бўлади, якшанба кунига келиб, ҳарорат кечаси +2...+7 даражага кўтарилади.
Бу кунларда ҳаво бироз булутли бўлади, баъзи жойларда ўзгариб туради, ёғингарчилик кутилмайди. Фақат айрим тоғ олди ва тоғли ҳудудларда 24 декабрь-якшанба куни асосан ёмғир кўринишидаги ёғингарчилик бўлиши мумкин.
Республиканинг баъзи жойларига кечаси ва эрталаб туман тушиши мумкин, Фарғона водийсининг айрим жойларига туман тушиши кундузи ҳам сақланиб туради. 24 декабрда республиканинг баъзи жойларида шамол тезлиги соатига 15-20 м/с гача кучайиши мумкин.
Пойтахтда 22-24 декабрь кунлари ёғингарчилик кутилмайди. Кечаси ва эрталаб баъзи жойларга туман тушиши мумкин. Шамол шарқдан бироз эсади. Ҳарорат бугун кундузи +10...+12 даража, шанба ва якшанба кунлари эса кечалари +3...+5 даража, кундуз кунлари +14...+16 даража илиқ бўлади.