Вилоятнинг чекка ва олис қишлоқларидаги иқтидорли ёшларни аниқлаш, футбол орқали уларнинг индивидуал қобилиятларини рўёбга чиқариш мақсадида сурхондарёлик таниқли спортчи Элдор Шомуродов футбол академиясини ташкил этиш режалаштирилган, дея хабар бермоқда Сурхондарё вилояти ҳокимлиги Ахборот хизмати.
Қайд этилишича, вилоят ҳокими Улуғбек Қосимов Термиз туманида жойлашган Футбол академияси негизида Элдор Шомуродов футбол академиясини қуриш бўйича ишлаб чиқилган лойиҳа билан танишди.
Қурилиш ишлари 2024 йил январь ойидан бошланиши режалаштирилган бўлиб, 154 ўринли академия лойиҳасида ёпиқ ва очиқ стадионлар, ётоқхона, ошхона ҳамда бошқа ёрдамчи бинолар бўлиши кўзда тутилган. Танишув чоғида лойиҳа-смета ҳужжатларини ишлаб чиқиш бўйича якуний ишларни бажариш ҳамда қурилишни белгиланган муддатда бошлаш топшириғи берилган.
Таъкидланишича, вилоят ҳокимининг Японияга ташрифида Vanfore Kofu футбол клуби билан Сурхондарё вилоятида футбол мактабларини ривожлантириш, академияларда ўқишни ташкил қилиш, ўйинчилар ва тренерлар алмашинувини йўлга қўйиш бўйича келишувларга эришилган.
