Бугун, 13 ноябрь куни соат 16:30 да, МАN русумли автобусда ёнғин ҳосил бўлгани ҳақида хабар ижтимоий тармоқларга сиздирилди. Ушбу ҳолат юзасидан "Тошшаҳартрансхизмат" АЖ расмий муносабат билдирди.
Аниқланишича, ёнғин автобус ҳайдовчиси ўриндиғи орқасида жойлашган электр симлари бирлашган блок қисмида қисқа туташув натижасида содир бўлган. Автобус кафолат муддатида тасарруф этилаётганлигини инобатга олиб, ёнғиннинг аниқ сабаби автобус ишлаб чиқарувчи завод "TRUCK and BUS MOTORS" МЧЖ мутахассислари билан биргаликда аниқланмоқда.
Ёнғин қутқарув бўлинмалари воқеа жойига соат 16:36 да етиб келган ва ёнғин бартараф этилган. Ҳодиса натижасида жабрланганлар ва жароҳат олганлар йўқ.
Ҳозирда, "Тошшаҳартрансхизмат" АЖнинг Ишлаб чиқариш техник бўлими ходимлари томонидан ҳам хизмат текшируви олиб борилмоқда.
