Пешку туман ИИБнинг UzNews.uz'га маълум қилишича, "Taftish.uz" ахборот агентлиги собиқ раҳбари Ғ.А.га нисбатан жиноят иши қўзғатилган.
Хабар қилинишича, Ғ.А. туман ҳудудида яшовчи фуқароларни алдаб, агентликнинг ижтимоий тармоқлардаги канали орқали уларнинг муаммоларини ҳал қилиб бериш эвазига, жуда кўп миқдордаги пулларини олиб, шахсий эҳтиёжларига ишлатиб юборганликда гумон қилинмоқда.
Жумладан, 2020 йил октябрда муқаддам Конимех туманидаги "Алибек Ислом" МЧЖ раҳбари А.И.га қарашли бўлиб, кейинчалик туман Қоракўлчилик ширкати балансига ўтказиб юборилган 1 400 га. яйлов ерларни фермер хўжалиги номига қайта расмийлаштириб беришни ваъда қилган. Натижада МЧЖ раҳбари А.И.дан жами 5 000 АҚШ доллари қийматдаги пул ва бошқа моддий қимматликларни олиб, шахсий эҳтиёжлари учун сарфлаган.
Қолаверса, фуқаро Қ.Х.дан туман ҳокимлиги захирасига олинган 1 800 га. яйлов ерларни унинг ўзига қайтариб олишда ёрдам беришини айтиб, бунинг эвазига ундан жами 22 000 АҚШ долларини олиб талон-торож қилиб юборган.
Бундан ташқари, 2022 йил ноябрь ойида фуқаро М.С.га "қамоққа олиш" тарзидаги эҳтиёт чораси қўлланилган вақтда қамоқдан чиқаришга ёрдам беришини айтиб, 5 000 АҚШ долларини фирибгарлик йўли билан қўлга киритган.
2022 йилнинг апрель ойида фуқаро А.Ҳ.нинг Андижон вилояти (Миллий гвардия)да ишловчи укасининг ишини Бухоро вилоятига кўчириб бериш эвазига ундан фирибгарлик йўли билан 800 АҚШ доллари олиб, шахсий эҳтиёжлари учун сарфлаганлиги айтилмоқда.
Шунингдек, Ғ.А. 2021 йил баҳорда Ж.У.дан 10-15 кунда қайтариб бериш шарти билан 500 АҚШ доллари олиб, ҳозирга қадар қайтармасдан, алдаб келган.
Таъкидланишича, Ғ.А. фуқароларни алдаш орқали уларнинг жами 33,3 минг АҚШ доллар қийматидаги пул маблағларини ўзлаштириб олиб, талон-торож қилиб юборган.
Мазкур ҳаракатлари учун "Taftish.uz" ахборот агентлиги собиқ раҳбари Ғ.А. ЖКнинг 168-моддаси 3-қисми ”б“ банди, 168-моддаси 4-қисми "а" банди ҳамда 25, 211-моддаси 2-қисми ”а" банди билан ишда айбланувчи тариқасида жалб қилиниб, унга сиртдан "қамоққа олиш" тарзидаги эҳтиёт чораси қўлланилган.