Қиличбозлик бўйича ёшлар ўртасида ўтказилган Жаҳон кубогининг навбатдаги босқич беллашувлари ўз якунига етди. Эрон пойтахтида ўтган сабля бўйича йигитлар ўртасидаги беллашувларда ҳам ўзбекистонлик қиличбозлар олтин медални қўлга киритишди. Бу ҳақда Миллий Олимпия Қўмитаси Матбуот хизмати хабар берди.
Жамоавий дастурда иштирок этган Исломбек Абдазов, Азизбек Даулетназаров ҳамда Сардор Абдукаримбеков триоси барча рақибларни мағлубиятга учратишга муваффақ бўлди.
Чемпионлик учун кечган финал беллашувида ўзбекистонлик спортчилар Туркия жамоасини 45:42 ҳисобида мағлубиятга учратишди.
Қайд этиш жоиз, жамоа етакчиси Исломбек Абдазов яккалик босқичида ҳам олтин медални қўлга киритган эди.
