"Аҳолига пенсия таъминоти соҳасида кўрсатилаётган давлат хизматлари сифатини янада оширишга қаратилган қўшимча чора-тадбирлар тўғрисида"ги президент қарори қабул қилинди.
Ҳужжатга кўра, 2025 йил 1 мартдан бошлаб 60 ёшга тўлган эркаклар ва 55 ёшга тўлган аёлларга пенсиялар ҳеч қандай ҳужжат талаб қилмасдан автоматик тарзда тайинланади.
Бунда, шахсга оид маълумотлар (фуқаронинг ёши, жинси), иш стажи, иш ҳақи (тўланган ижтимоий солиқ суммаси) ва оила таркиби (турмуш ўртоғи ва фарзандлари) Адлия вазирлиги, Бандлик вазирлиги ҳамда Солиқ қўмитасининг электрон базаларидан олинади.
Шундай қилиб, фуқаролар пенсия тайинлаш учун қўшимча ҳужжатлар тўплашлари ва яшаш жойидаги Пенсия жамғармасининг ҳудудий бошқармасига мурожаат қилишлари шарт эмас.
Шунингдек, пенсия ёшига етган, лекин нафақага чиқмасдан ишлашни давом эттириш истагида бўлган ёки пенсия миқдорига рози бўлмаган фуқароларга пенсияларни автоматик ҳисоблашни рад этиш ҳуқуқи берилади.
Пенсия миқдорига рози бўлмаган фуқаролар исталган вақтда пенсия миқдорига таъсир қилувчи қўшимча ҳужжатларни тақдим этиш ҳуқуқига эга.
Бундан ташқари, 2024 йил 1 январдан бошлаб:
• фуқароларга давлат хизматлари марказлари орқали ёки Ягона интерактив давлат хизматлари портали орқали пенсия тайинлаш учун ариза бериш имконияти берилади;
• фуқароларга пенсия тайинланганидан кейин "Халқ банки"да тўпланган пенсия пулларини олиш учун Пенсия жамғармасидан қоғозда маълумотнома бериш тартиби бекор қилинсин. Бунда сиз фуқаронинг Халқ банкидаги фаолияти давомида ҳар ойда тўплаган маблағларини Интерактив давлат хизматлари портали ёки банкнинг мобил иловаси орқали олишингиз мумкин.