Охирги 18 кун ичида Ғазо секторидаги тинимсиз ҳужумлар туфайли 2 360 нафар бола ҳалок бўлган ва 5 364 нафар бола жароҳат олган ёки ҳар куни 400 дан ортиқ болалар ҳалок бўлган ёки яраланган. Бу ҳақда ЮНИСЕФ баёнотида келтирилган.
Қайд этилишича, 30 дан ортиқ исроиллик болалар ҳаётдан кўз юмгани, ўнлаб болалар эса Ғазо секторида асирликда қолаётгани хабар қилинган. 18 кунлик муддат Ғазо сектори ва Исроилда 2006 йилдан бери БМТ гувоҳи бўлган жанговар ҳаракатларнинг энг ҳалокатли авж олишидир.
"Юзга яқин фаластинликлар, жумладан, 28 нафар бола ҳалок бўлган ва камида 160 нафар бола жароҳат олган. 2023 йил 7 октябрдаги фожиали воқеалардан олдин ҳам, Ғарбий Соҳилдаги болалар сўнгги йигирма йил ичида энг юқори даражадаги можаро билан боғлиқ зўравонлик билан курашаётган эди, натижада бу йил шу пайтгача 41 нафар фаластинлик ва 6 нафар исроиллик бола ҳалок бўлди", - дейилади хабарда.
Маълум қилинишича, Ғазо секторининг қарийб 2,3 миллион кишидан иборат бўлган бутун аҳолиси оғир оқибатларга олиб келадиган оғир ва кескин сув танқислигига дуч келмоқда. Ёқилғи тақчиллиги ва муҳим ишлаб чиқариш, тозалаш ва тарқатиш инфратузилмасига зарар етказиш каби омилларнинг комбинацияси туфайли сув тизимларининг аксарияти жиддий зарар кўрган ёки ишламай қолган. Ҳозирги вақтда сув ишлаб чиқариш қуввати одатдаги кунлик ишлаб чиқаришнинг атиги 5 фоизини ташкил қилади.