Жорий йилнинг 8 ойида республикада 2 минг 121 нафар вояга етмаганлар томонидан 2 минг 24 та жиноят содир этилган. Вояга етмаганлар томонидан содир этилган жиноятларнинг 1 минг 424 ҳолати мактабларда, 291 таси академик лицей ва касб-ҳунар таълими муассасаларида, 142 нафар ишламасдан юрганлар (мактабни тамомлаган) ҳамда 264 ҳолатда ишлайдиган вояга етмаганлар томонидан содир этилган, дея хабар бермоқда ЎзА.
148 нафар шахс вояга етмаганларни ғайриижтимоий хатти-ҳаракатларга жалб қилган бўлиб, уларга нисбатан МЖтКнинг 188-моддасига асосан чоралар кўрилган.
Ёшлар ўртасида жиноят содир этиш, диний экстремистик оқимларга, террорчи гуруҳларга қўшилиб қолиш ҳолатлари ҳам учрамоқда.
Жорий йилнинг ўтган 8 ойи мобайнида дарс вақтида диний муассасалар ҳудудида бўлган 470 нафар ўқувчи дарс машғулотларига қайтарилиб, ота-оналари ва уларнинг ўрнини босувчи шахслар билан тегишли тартибда профилактик тушунтириш ишлари олиб борилди, дарсларни бир неча маротаба тарк этганлар алоҳида назоратга олинди.
