Ўзбекистон ҳукумати ва Бирлашган Миллатлар Ташкилотининг лойиҳа хизматлари бўйича бюроси (UNOPS) ўртасида ҳамкорлик тўғрисидаги битим имзоланди, деб хабар қилди ташкилот матбуот хизмати.
Битим Марказий Осиёда барқарор ривожланишга кўмаклашиш ва ҳамкорликни мустаҳкамлаш, UNOPS'нинг Ўзбекистондаги иштирокини кенгайтириш ва унинг минтақадаги саъй-ҳаракатларини оширишга қаратилган.
Битим халқаро стандартларга жавоб берадиган таълим, соғлиқни сақлаш ва ижтимоий ҳимоя тизимларини модернизация қилишга қаратилган "Ўзбекистон-2030" стратегиясига ҳам мос келади.
UNOPS аллақачон Ўзбекистонда соғлиқни сақлаш ва эпидемияга тайёргарликни яхшилашга қаратилган бир қанча лойиҳаларда иштирок этмоқда. Ташкилот, шунингдек, инфратузилмани ривожлантириш ва инклюзив ва технологияга асосланган таълимни рағбатлантириш орқали таълим соҳасини қўллаб-қувватлаш йўлларини ўрганмоқда.
"Бу Ўзбекистон ҳукумати билан ҳамкорлигимиздаги муҳим босқич бўлиб, бутун Марказий Осиё бўйлаб ишимиз кўламини кенгайтиришга ёрдам беради. БМТнинг Ўзбекистондаги мамлакат жамоаси доирасидаги ҳамкорлигимиз орқали биз яқин йилларда соғлиқни сақлаш ва диагностика соҳасида ижобий натижаларга эришишга умид қиламиз", — деди UNOPS ижрочи директори Георгес Мореира да Силва.
Янги келишув Ўзбекистонда Барқарор ривожланиш мақсадларига эришишга салмоқли ҳисса қўшадиган асосий ижтимоий инфратузилмани, жумладан, шифохоналар, мактаблар ва транспорт тизимларини қуриш ва реабилитация қилиш каби комплекс лойиҳаларни амалга оширишга қаратилган ушбу саъй-ҳаракатларни янада ривожлантиради.
"Биз ишончимиз комилки, ваколатхона алоқаларимизни янада бойитишга, айниқса, "Ўзбекистон-2030" стратегияси ва барқарор ривожланиш мақсадларини амалга оширишда хизмат қилади", – дея қўшимча қилди Ўзбекистон Ташқи ишлар вазири Бахтиёр Саидов.