Душанба куни Жанубий Кёнсан вилоятининг Янсан шаҳридаги ресторанлардан бирида содир бўлган ёнғинда 40 ёшли ўзбек йигити ўз ҳаётини хавф остига қўйиб, 69 ёшли кореялик аёлни қутқарди, дея хабар бермоқда Жанубий Корея нашри.
Жанубий Кёнсан вилояти ёнғин хавфсизлиги бошқармаси маълумотларига кўра, ёнғин душанба куни соат 18:44 атрофида Янсаннинг Букбу-донг шаҳридаги кекса эр-хотин томонидан бошқариладиган ресторанда содир бўлган. Ресторанда портлаш овози, синган ойналар ва алангани кўриб, воқеага гувоҳ бўлган шахс 119 рақамига қўнғироқ қилган. Бироқ бу орада аёл ресторанда ёлғиз бўлган ва аланга ичида қолиб кетган.
Аёлнинг 70 ёшлардаги турмуш ўртоғи ёнғин бошланишидан олдин ресторандан чиқиб кетган ва шиддатли ёнғин туфайли ичкарига кира олмаган. Шу пайт қўшни уйда яшовчи Ўзбекистон фуқароси ёнаётган ресторан ичкарисига кириб, аёлни қутқариб қолган.
Ёнғин бутун ресторан ва яқин атрофдаги автомобилларни қамраб олган. Ўт ўчирувчилар томонидан ёнғин соат 19:11 да тўлиқ ўчирилди ва ёнғин оқибатида 80 миллион вон (60 419 доллар) миқдорида зарар етди.
Айни пайтда аёл бутун танасининг иккинчи даражали куйиш жароҳати билан касалхонада даволанмоқда, унинг эри ҳам ёнғинда олган жароҳатлари туфайли даволанмоқда. Аёлни қутқарган ўзбекистонлик шиша синишидан енгил тан жароҳати олиб, уйига қайтгунга қадар воқеа жойида биринчи тиббий ёрдам кўрсатилган.
Ўт ўчириш хизматлари ёнғиннинг аниқ сабабларини ўрганмоқда, дейилади хабарда.