“Андижон-SGS” клуби футболчилари ва Ўзбекистон футбол ҳакамлари маркази ҳаками Лочин Долимов тил бириктириб, келишилган ўйин ташшкил қилгани аниқланди. Бу ҳақа Ўзбекистон футбол ассоциацияси маълум қилди.
Қайд этилишича, ассоциация Этика қўмитасининг навбатдаги йиғилишида мазкур масала кўриб чиқилган.
Маълум бўлишича, Ўзбекистон Про лигасида ҳакамлик қилиб келган Лочин Долимов ўзининг таниши орқали хориждаги А. исмли шахс билан Telegram'да алоқа ўрнатиб, келишилган ўйинларни ташкил этишга уринган.
Шунингдек, Лочин Долимов “Андижон-SGS” клубининг футболчилари Шаҳбозбек Жумабоев, Дилмурод Абдуқаҳҳоров ва Жавоҳир Қиличев билан тил бириктирган ҳолда 2023 йил 25 май куни Про лига доирасидаги “Навбаҳор Фарм” ва “Андижон-SGS” ўртасидаги учрашувнинг натижасига таъсир ўтказиб, учинчи шахслар ёрдамида букмекерлик конторалари орқали пул тикиб, моддий манфаат кўрган.
Йиғилишда Этика қўмитаси томонидан Лочин Долимов ЎФА Интизом кодексининг тегишли бандларини бузгани учун айбдор деб топди. Унга нисбатан футбол билан боғлиқ фаолиятнинг барча туридан умрбод четлатиш ҳамда жарима интизом жазоси қўлланилди. Шунингдек, “Андижон-SGS” клубининг футболчиси Шаҳбозбек Жумабоев ҳам умрбодга футболдан четлаштирилди.
Дилмурод Абдуқаҳҳоровга нисбатан футбол билан боғлиқ фаолиятнинг барча туридан 2 йил муддатга четлатиш ҳамда жарима интизом жазоси берилди. Жавоҳир Қиличевга нисбатан эса футбол билан боғлиқ фаолиятнинг барча туридан 1 йил муддатга четлатиш ҳамда жарима интизом жазоси қўлланилди.
“Ўзбекистон футбол ассоциацияси келишилган ўйинларни аниқлаш бўйича FIFA, ОФК, “Sportradar” ва бошқа тегишли ташкилотлар билан билан мунтазам равишда ҳамкорлик қилиб келаётганлигини маълум қилади. Ўз навбатида, келгусида аниқланадиган ҳолатлар юзасидан айбдор шахсларга нисбатан қатъий чоралар кўрилиши тўғрисида огоҳлантиради”, - дейилади хабарда.