Қашқадарёда ҳайдовчига нисбатан куч ишлатган транспорт бошқармаси ходими ишдан олинди. Бу ҳақда вилоят транспорт бошқармаси маълум қилди.
Қайд этилишича, ушбу воқеа ҳақида аввалроқ интернет саҳифаларида видеолавҳа тарқалган ва мазкур ҳолат бўйича Қашқадарё вилояти транспорт бошқармаси ўрганиш олиб борган.
“Ҳақиқатан ҳам воқеа 2021 йил 30 январь куни Яккабоғ туманида содир бўлган. Ҳолат юзасидан бошқарма томонидан ўрганиш ташкил этилди. Видеолавҳада акс этган вазият ўз хизмат ваколатларидан четга чиқиш, дея баҳоланди”, дейилади транспорт бошқармаси хабарида.
Хизмат вақтида ножўя хатти-ҳаракатни амалга оширгани учун ходим Б.М.га кескин чора кўрилди, у бошқарма бошлиғининг буйруғи билан эгаллаб турган вазифасидан озод этилди.