Шавкат Мирзиёев бугун, 18 август куни халқаро конгресслар марказида тадбиркорлар билан очиқ мулоқот ўтказди, деб хабар қилди президент Матбуот хизмати.
Давлат раҳбарининг фармонига мувофиқ, мамлакатнинг иқтисодий қудрати ва аҳоли фаровонлигини юксалтиришда ўз хизматларини кўрсатган 44 нафар фуқаролар давлат мукофотлари билан тақдирланди. Тадбирда орден ва медалларни ўз эгаларига тантанали топшириш маросими бўлиб ўтди.
Хусусан, пойтахтдаги "Orient Ceramic" хусусий корхонаси асосчиси Улуғбек Расулов "Меҳнат шуҳрати" ордени билан тақдирланди. Президент "Almerro Group" МЧЖ таъсисчиси Раҳматжон Абдуллаев, "Kanishka Fur" МЧЖ бош директори Алексей Маншаев, "Alutex" МЧЖ таъсисчиси Тоҳир Шарипов ва "New retail" МЧЖ таъсисчиси Қахрамонжон Олимовни "Дўстлик" ордени билан тақдирлади.
"Шуҳрат" медали пойтахтдаги "Nika Medical Service" хусусий тиббиёт клиникаси директори Нигора Муратова ва "MAAB Innovation" МЧЖ асосчиси Шерзод Ибрагимовга топширилди.
Давлат мукофотлари эгаларининг тўлиқ рўйхати билан ҳавола орқали танишишингиз мумкин.
Шу билан бирга, 126 нафар фаол тадбиркор "Фаол тадбиркор" кўкрак нишони билан тақдирланди, хусусан, "Magnum Mediсal Servis" тиббий асбоб-ускуналар ишлаб чиқариш корхонаси бош директори Отабек Жиянбоев, "Нурафшон-нур" хусусий корхонаси раҳбари Муҳаббат Тошмуҳамедова ва Тошкент шаҳар тадбиркор аёллар маркази раҳбари Вазира Йўлдошева, Sun Tex МЧЖ асосчиси Наримон Акбаров ва бошқалар.