Жорий йилнинг 1 август куни Самарқанд вилояти ИИБ ЖХХ ва тегишли ташкилот ходимлари томонидан Булунғур туманида жойлашган "Юқори нуқта" ЙПХ масканида Isuzu русумли автотранспорт воситаси тўхтатилган.
Аниқланишича, автомобиль ҳайдовчиси Х.Ш. "Самарқанд-Тошкент" йўналишида ҳаракатланиб келаётган бўлган.
Автомобиль юкхонасида келиб чиқиши номаълум бўлган, ветеринария-санитария талабларига зид равишда бирор-бир ҳужжатларсиз олиб кетилаётган 1100 кг гўшт маҳсулоти борлиги аниқланган.
Мазкур гўшт маҳсулотларининг истеъмолга яроқлилиги текширилганда, истеъмолга яроқсизлиги маълум бўлган.
Шунингдек, бугун, 3 август куни тунги соат 00:05 атрофида "Омонқўтон" ЙПХ масканида ҳаракатланиб келаётган Cobalt русумли автотранспорт воситаси тўхтатилган.
Автомобиль текширилганда юкхонасида келиб чиқиши номаълум бўлган, бирор-бир ҳужжатларсиз олиб кетилаётган 500 кг гўшт маҳсулоти борлиги аниқланган.
Юқоридаги ҳолатлар юзасидан яроқсиз гўшт маҳсулотлари тегишли тартибда йўқ қилиниб, ҳозирда ҳайдовчига нисбатан терговга қадар текширув ҳаракатлари олиб борилмоқда.
