Фармонга мувофиқ 1 сентябрдан бошлаб Тошкент шаҳрида Республика ихтисослаштирилган оториноларингология ва бош-бўйин касалликлари илмий-амалий тиббиёт маркази ташкил этилмоқда.
Марказ биноси пойтахтнинг Яшнобод тумани, Маҳтумқули кўчаси 103-уйда жойлашган.
Тиббиёт муассасасининг вазифалари қаторига ихтисослаштирилган тиббий ёрдам кўрсатиш, шунингдек, оториноларингологик касалликлар ва бош-бўйин касалликларини ташхислаш ҳамда даволашнинг замонавий усулларини жорий этиш киради.
2024/2025 ўқув йилидан бошлаб марказда клиник ординатура орқали "оториноларингология" мутахассислиги бўйича тиббиёт кадрларини тайёрлаш ташкил этилади.
Бундан ташқари, 2024 йил 1 январдан бошлаб нодавлат тиббиёт ташкилотларига имтиёзли тоифадаги шахслар учун оториноларингология ва юз-жағ жарроҳлиги соҳасида давлат бюджети маблағлари ҳисобидан тиббий хизматлар кўрсатишга рухсат берилди.
Касалхона ва поликлиникаларнинг оториноларингология бўлимларини тиббий асбоб-ускуналар билан жиҳозлаш учун 17 миллион доллар ажратилади.
2024 йилдан бошлаб кохлеар имплантация операцияларига тайёрланаётган эшитиш қобилияти заиф болаларга ҳар йили давлат бюджети маблағлари ҳисобидан камида 2 минг дона рақамли эшитиш аппаратлари етказиб берилади.
Шунингдек, Республика шошилинч тиббий ёрдам илмий маркази ва унинг ҳудудий филиаллари қабул қилиш ва диагностика бўлимида оториноларинголог ва юз-жағ жарроҳларининг қўшимча штат бирликлари жорий этилиб, кеча-ю кундуз иш олиб борилмоқда.
