Жорий йилнинг 8 март куни Самарқанд вилояти Тойлоқ туманидаги ТТЁ марказларидан бирининг навбатчи шифокори вилоят ИИБга ариза билан мурожаат қилган. Бу ҳақда ИИВ Ахборот хизмати хабар қилди.
Маълум қилинишича, шифокор ТТБда хизмат вазифасини бажараётган вақтида тиббий чақирув келиб тушган. Чақирувга асосан, мазилга борганда, фуқаро унинг хизмат вазифасини бажаришга тўсқинлик қилиб, шифокорни дўппослаган.
Айбланувчининг таъкидлашича, ТТЁ ходимларининг чақирувга кеч етиб келганлиги унинг шифокорга қўл кўтаришига сабаб бўлган.
Мазкур ҳолат юзасидан ўрганиш ишлари олиб борилган.
Натижада ушбу ҳолат Тойлоқ туманида яшовчи фуқаро томонидан содир этилганлиги, у аввал ҳам бир неча бор жиноий жавобгарликка тортилганлиги маълум бўлган.
Унга нисбатан ЖКнинг тегишли моддалари билан жиноят иши қўзғатилиб, ҳужжатлар ЖИБ Тойлоқ тумани судига юборилган.
ЖИБ Тойлоқ тумани судининг қарорига кўра, шифокорни урган фуқаро 3 йил-у 5 ой муддатга уй қамоғига ҳукм қилинган.
