Олий Мажлис Сенати раиси Танзила Нарбаева бошчилигидаги Ўзбекистон делегацияси амалий ташриф билан Франция Республикаси пойтахти Париж шаҳрида бўлиб, Сенат раиси ташриф доирасида Франция Сенати раиси Жерар Ларше билан учрашган. Бу ҳақда Олий Мажлис Сенати Матбуот хизмати хабар берди.
Франция Сенати раиси Жерар Ларше сўнгги йилларда Ўзбекистоннинг чинакам бозор иқтисодиётига ўтиши ва жаҳонга очилиш йўлида амалга оширган ишлари мустақилликнинг барча йиллари давомида қилинган жами ишлардан ҳам салмоқли эканлигини эътироф этди.
Томонлар икки палатали парламент демократик ривожланишнинг муҳим таркибий шарти эканлигини бирдек эътироф этиб, давлатларимиз ўртасидаги парламентлараро алоқаларни ривожлантиришда юқори палаталарнинг вакиллик демократияси механизмларидан самарали фойдаланиш зарурлиги таъкидланди.
Қайд этилишича, Ўзбекистон Олий Мажлисининг палаталарида Франция парламенти билан ҳамкорлик гуруҳлари ташкил этилган бўлиб, Франция Сенатида ҳам "Франция – Марказий Осиё" парламентлараро гуруҳи, қуйи палата – Миллий ассамблеяда "Франция – Ўзбекистон" дўстлик гуруҳи фаолият юритмоқда.
Бу борада Т.Нарбаева ҳамкорлик гуруҳлари салоҳиятидан янада самарали фойдаланиш муҳимлигини, жумладан, давлатлар ўртасидаги парламентлараро ҳамкорликнинг таянч нуқталари қонун ижодкорлиги, кучли парламент назорати ва ҳудудий вакиллик тамойилларига қурилиши зарурлигини алоҳида таъкидлади.
Суҳбат якунида Франция ва Ўзбекистон маҳаллий ҳокимият органлари ўртасидаги алоқаларни йўлга қўйиш, қонун ижодкорлиги соҳасида тажриба алмашиш, шунингдек, яшил иқтисодиёт, коррупцияга қарши курашиш, гендер тенгликни таъминлаш соҳаларида ҳам конструктив ҳамкорлик қилишга келишиб олинди.