Аввалроқ, ижтимоий тармоқларда аёл томонидан ўз фарзандлари аёвсиз калтаклангани акс этган видео тарқалган эди. Видеода кўриш мумкинки, аёл эрига жаҳл қилиб,
"Мана болаларингиз, боқолмайсизми? Мен ҳам боқа олмайман. Битта-битта ўлдираман. Ўлгани яхши,- дея аламини фарзандларидан олган.
Ҳолат юзасидан Самарқанд вилояти ИИБ Ахборот хизмати раҳбари Жаҳонгир Сагдуллаев расмий маълумот берди.
Мазкур ҳолат жорий йилнинг 14 июль куни Каттақўрғон тумани "Баландравот" МФЙга қарашли Туйнак қишлоғида содир бўлган.
Қайд этилишича, 1996 йилда туғилган аёл З.Ш. айни дамда Россия Федерациясида бўлган турмуш ўртоғи билан телефон орқали мулоқотда жанжаллашиб қолган. Натижада икки нафар вояга етмаган фарзандларини уриб, ҳолатни тасвирга олган ва турмуш ўртоғига юборган.
Ушбу ҳолат юзасидан ЖКнинг 110-моддаси (Қийнаш) 2-қисми билан жиноят иши қўзғатилиб, тергов ҳаракатлари олиб борилмоқда
Ҳозирда болаларнинг аҳволи яхши. Улар онасидан олиниб, қариндошлари қарамоғига берилган. Ҳолат мутасаддилар назоратига олинган,- дейилади хабарда.
