ИИВ Ахборот хизматининг хабарига кўра, мазкур ҳолат жорий йилнинг 30 июнь куни Тошкент вилоятидан ўтувчи "Нурафшон-Оҳангарон" йўлида содир бўлган. Унда Damas автомобили қарама - қарши йўлга чиқиб, Istana русумли транспорт воситасини уриб юборган. Натижада 20 киши жабрланган.
Бундан ташқари, йўл-транспорт ҳодисаси оқибатида Damas автомобилининг 1989 ва 2000 йилда туғилган 2 нафар йўловчиси вафот этган.
Аниқланишича, микроавтобус йўловчилар билан тўлган ҳолатда ҳаракатланган.
Оҳангарон шаҳар марказий шифохонаси бош шифокори беморларнинг ҳолатини қуйидагича изоҳлади:
"Автоҳалокат натижасида олиб келинган 20 нафар беморнинг барчасига тиббий ёрдам кўрсатилди. Бугунги кунда 3 та бемор шифохонамизнинг хирургия бўлимида, аҳволи стабил. Қолган беморлар ўзларининг турар жойидаги марказларига жўнатилмоқда".
Ҳозирда ЙТҲ юзасидан ЖКнинг 266-моддаси 2-қисми билан жиноят иши қўзғатилиб, тергов ҳаракатлари олиб борилмоқда.