Олий Мажлис Сенати раиси Танзила Нарбаева Швейцариянинг Женева шаҳрида ўтказилган Халқаро меҳнат конференциясининг 111-сессияси доирасида ХМТ Халқаро меҳнат стандартлари департаменти директори Корин Варга билан музокара ўтказди.
Мулоқот чоғида муносиб меҳнат шароитларини яратиш, меҳнат соҳасида инсон қадр-қиммати ва эркинликларини ҳимоя қилиш, мазкур йўналишда халқаро стандартларни реал ва изчил жорий этиш масалалари муҳокама қилинди.
Халқаро меҳнат ташкилоти департамент директори Ўзбекистон томонига ХМТ билан конструктив ҳамкорлик қилиш йўлидаги қатъият ва сиёсий ирода учун миннатдорлик билдирди.
"Ўзбекистон билан кўп йиллик ҳамкорлик натижасида олган тажрибамиздан бугунги кунда ХМТ шу каби муаммоларга дуч келаётган бошқа давлатлар билан мулоқот ўрнатишида самарали фойдаланмоқда. Мамлакатингиз ХМТ учун бошқа давлатлар, айниқса, Марказий Осиё минтақасида ўзига хос намунали модель бўла олишини алоҳида таъкидламоқчимиз", – деди Корин Варга.
Учрашув сўнгида ХМТ конвенцияларини ратификация қилиш ва уларнинг ижросини таъминлаш йўналишида ҳамкорликни янада кенгайтиришга келишиб олинди.