Хабарингиз бор, Аргентина яшил майдонларида 20 ёшгача бўлган футболчилар ўртасида бўлиб ўтаётган жаҳон чемпионатида Ўзбекистон ёшлар терма жамоаси иштирок этмоқда. Кеча Равшан Ҳайдаров бошчилигидаги Ўзбекистон U-20 терма жамоаси гуруҳдаги иккинчи тур ўйинида Янги Зеландияга қарши баҳс олиб борди ва 2:2 ҳисобида дуранг натижа қайд этди.
Ушбу ўйин олдидан мундиални ёритиб бораётган ўзбекистонлик ОАВ вакили терма жамоа футболчиси Нодир Абдураззоқов билан уюштирган интервьюни ижтимоий тармоққа жойлади.
Ўзбекистонлик журналистнинг Нодир Абдураззоқовга гуруҳдаги ўйинларга тайёргарлик қандай бўляпти, нималарга кўпроқ эътибор қаратяпсиз, аргентиналик қизлар билан танишишгами ёки бошқа жиҳатларгами? Биринчи ўйинда сиз тепган тўпни Google maps'дан кузатиб турибмиз, ҳали пастга тушмади, қачон пастга тушади, дея берган саволи Ўзбекистон МТЖ ва Саудия Арабистонининг “Ал-Наср” клуби футболчиси Жалолиддин Машариповнинг ғазабланган ҳолда ўз муносабатини билдиришига сабаб бўлди. Машарипов футболчиларга қуйидагича мурожаат йўллади.
“Аргентинада бўлиб ўтаётган жаҳон чемпионатида ўзбекистонлик футболчига журналист томонидан берилган саволни эшитдингларми? Шу даражада савияси паст-ки, у футболчининг устидан кулиб, тепган тўпинг ҳали ҳам пастга тушгани йўқ, деяпти. Одамга дўст бўлинглар.
Биламан сизлар барибир футболчига дўст бўлмайсизлар. Чунки у футболчилар Ўзбекистонда бўлиб ўтган Осиё кубогида чемпион бўлиб, ўзбек халқини хурсанд қилди. Сизлар нима қиляпсизлар, қизлар билан кўришяпсанми каби саволлар беряпсизлар. Футболчиларга мурожаатим, бирортангиз журналистларга интервью берманглар. Журналистлар ҳаёлингларни бузмоқда.
Ҳозир бир-иккита яхши ўйнаб турган футболчиларга яхши гапиради, эртага сал хато қилиб қўйса, сизларни ҳам кўмади. Шунинг учун ҳам интервью сўрашса ҳеч бирига берманглар. Ўша футболчини ота-онаси, яқинлари кўряпти, бу журналист ўшаларни олдида футболчининг устидан куляпти. Савол бераётган ОАВ вакили шу ҳақида ўйламайдими? Футболчиларга мурожаатим, ОАВ вакилларига интервью берманглар.
Мундиалда муносиб иштирок этиб, қайтиб келинглар, булар барибир олдингизга интервью беринглар деб ялиниб боради. Биз ҳамма ўйинларни кўриб турибмиз. Сизларга фақат омад.
ОАВ вакилларига яқинлашманглар. Булар сизларга дўст бўлмайди, шуни билинглар. Дўст бўлганида шундай савол берармиди? Журналистнинг савияси паст эканлиги саволидан билиниб турибди”, — деди Жалолиддин Машарипов.