Ҳолат Тошкентнинг Миробод туманида содир бўлган. Аниқланишича, 1979 йилда туғилган судланувчи эркак шаръий никоҳдаги аёли билан доимий равишда жанжаллашиб келган.
Жабрланувчи аёлнинг айтишича, эркак уйга келиб, доим пул талаб қилган. Агар топиб бермаса, жанжал қилиб, хотинининг бўйнидан бўғиб, қийноққа солган.
Ҳодиса содир бўлган куни, аёл ИИБга телефон қилган. ИИБ ходимлари келганда эркак аёлнинг бўйнига пичоқ тираб, ходимлар кетишини талаб қилган. Агар, кетмаса, аёлни ҳам унинг қизини ҳам ўлдириш билан таҳдид қилган.
“Ичиб келиб, эшикларни тепади, калламни деворга уради. Ўзимни ҳимоя қилаётганимда, қўлимни кесиб юборган. Жазосини олсин у”, - дейди жабрланувчи аёл.
Ўша куни ИИБ ходимларининг тезкор ҳаракатлари натижасида, аёл ва унинг қизининг ҳаёти сақлаб қолинади.
Жиноят ишлари бўйича Миробод туман судида эркакка нисбатан суд ҳукми ўқилди. Судда айбланувчи айбига тўлиқ иқрор бўлиб, қилмишидан афсусдалигини билдирди.
“Айбимни тан оламан. Бу ишни қўрқитиш учун қилгандим. Бирор жойини кесганим йўқ. Болаларимиз икки хил тоифага ажралиб қолган. Биринчи фарзандим бошқа отадан, иккинчиси мендан бўлган. Менинг уйим йўқ, ички-куёвман. Аёлимдан узр сўрайман. Бошқа гапим йўқ”, - дейди у.
Ўқилган суд ҳукмига кўра, эркак Жиноят кодексининг 245-моддаси (шахсни гаров сифатида тутқунликка олиш) “а” ва “б” бандлари билан айбдор деб топилиб, 10 йил муддатга озодликдан маҳрум қилинди.