Ижтимоий тармоқларда "Андижон шаҳрида номаълум одамни ёнган жасади топилганлиги" ҳақидахабар тарқалган эди. Ҳолат юзасидан вилоят прокуратураси расмий баёнот берди.
Аниқланишича, жорий йилнинг 9 май куни Ҳиндистондан Ўзбекистонга келган фуқаро (1986 йилда туғилган эркак) Андижон давлат тиббиёт институтида таҳсил олаётган 2002 йилда Ҳиндистонда туғилган талаба қизни олдига келиб, унга турмуш қуриш истагида келганлигини билдирган ва институт яқинидаги меҳмонхонада яшаб келган.
Қиздан рад жавобини олганидан сўнг унинг руҳиятида ўзгариш бўлиб, Ҳиндистонлик бошқа талабаларга энди ҳаётнинг қизиғи йўқлиги, ўз жонига қасд қилиши ҳақида айтиб келган. Оқибатда "Заҳириддин Муҳаммад Бобур" номидаги истироҳат боғи ҳудудига кирувчи адирликда номаълум суюқлиқ ёрдамида ўзини ёқиб, воқеа жойида вафот этган.
Судга оид тиббий экспертизанинг дастлабки маълумотларига кўра, марҳумнинг танаси ва ички аъзоларида бирор бир кўринишдаги тан жароҳатлари аниқланмаган.
Ҳозирда суд-тиббий, суд-кимёвий ва суд-биологик экспертизалари тайинланган.
Мазкур ҳолат бўйича ЖКнинг 103-моддаси 1-қисми билан жиноят иши қўзғатилган.