Аввал хабар қилганимиздек, президентнинг 2023 йил 1 майдаги қарори билан Тошкент шаҳрида ҳуқуқий эксперимент сифатида савдо нуқталарида нақд пул ечиб олиш хизматларини кўрсатиш ва виртуал кассалар тармоғи билан қамраб олинган хизматлар кўрсатиш амалиётини жорий этиш режалаштирилган эди.
"Кorzinka" супермаркетлар тармоғида фаолият юритувчи "Anglesey Food" компанияси Марказий банкнинг "Тартибга солиш қумдони"нинг биринчи иштирокчиси бўлди, деб хабар берди регулятор матбуот хизмати.
Тажриба тариқасида кассада банк картасидан нақд пул ечиб олиш амалиёти жорий этилди. Тажрибали лойиҳа 2023 йил 1 ноябргача амалга оширилади.
"Кorzinka" вакилларининг UzNews.uz'га маълум қилишича, дастлабки босқичда ушбу хизмат фақат Тошкент шаҳрининг Юнусобод туманида жойлашган "Shedevr" савдо марказидаги супермаркет филиалида ҳамда HUMO карталаридан нақд пул ечиб олишда ишлайди. Яқин вақт ичида хизмат Uzcard тўлов тизимига ҳам жорий қилинади.
Харид қилишда битта банк картасидан нақд пул ечиб олишнинг минимал миқдори 50 000 сўм, кунлик лимити эса 300 000 сўмни ташкил қилади. Шу билан бирга, кассадан нақд пул олиш фақат 50 000 сўмга каррали миқдорда амалга оширилади.
Харид қилишда нақд пул олиш хизмати учун комиссия миқдори 1% ни ташкил қилади.
Қайд этилишича, ушбу хизмат товарни ушбу дўкондан харид қилиш шарти билан тақдим этилади.
"Тартибга солиш қумдони" - бу амалдаги қонунчилик билан тартибга солинмаган технологияларни экспериментал жорий этиш учун махсус ҳуқуқий режим.