Бугун, 8 май куни Ж. исмли шахс Telegram'даги дўстлари бўлган гуруҳга нашида юборгани учун 3 йилга озодликдан маҳрум қилингани ҳақидаги хабар ижтимоий тармоқларга сиздирилди. Ушбу ҳолат бўйича Олий суд Ахборот хизмати UzNews.uz'га маълумот берди.
Жорий йилнинг 8 май куни жиноят ишлари бўйича Тошкент вилояти Оққўрғон туман судида Ж.У.га нисбатан қўзғатилган жиноят иши кўриб чиқилди.
Суд ҳукмига кўра, судланувчи Ж.У. ЖКнинг 244-моддаси (жамоат хавфсизлиги ва жамоат тартибига таҳдид соладиган материалларни тайёрлаш, сақлаш, тарқатиш ёки намойиш этиш) 3-қисми "г" бандида назарда тутилган жиноятни содир этганликда айбли деб топилди ва унга нисбатан ЖКнинг 244-моддаси 3-қисми "г" банди билан ЖКнинг 57-моддасини (енгилроқ жазо тайинлаш) қўллаб, 3 йил муддатга озодликдан маҳрум қилиш жазоси тайинланди.