Тошкент ер усти халқа метро йўлининг II босқичи доирасида қуриб битказилган 5 та бекатда йўловчи ташувлари бошланди. Бу ҳақда Транспорт вазирлиги Матбуот хизмати хабар берди.
“Қўйлиқ – Қурувчилар” участкасида қурилиш ишлари тугатилган 5 та бекатнинг умумий узунлиги 7,74 километр. Шундай қилиб, Тошкент метрополитенининг бекатлари сони 48 тага етди. Ер усти метроси қурилишининг иккинчи босқичи тўлиқ якунланиши билан Тошкент метрополитенининг жами узунлиги 70 километрдан зиёд, бекатлар сони 50 та бўлади.
