"Осиё тараққиёт банки иштирокида "Ўзбекистон Республикаси шаҳарларини комплекс ривожлантириш дастури" лойиҳасини амалга ошириш чора-тадбирлари тўғрисида"ги президент қарори қабул қилинди.
Ҳужжат Ўзбекистон президентининг 2021 йил 30 декабрдаги қарорига мувофиқ ишлаб чиқилган бўлиб, унда "Ўзбекистон шаҳарларини комплекс ривожлантириш" лойиҳасини амалга ошириш учун 59 миллион доллар миқдорида кредит шартномасини имзолаш бўйича дастлабки келишувга эришиш кўзда тутилган.
Лойиҳани амалга ошириш муддати 5 йил (2023–2027).
У қуйидагилар учун маблағ ажратишни назарда тутади:
• шаҳар инфратузилмаси ва хизматларини яхшилаш — 24 миллион доллар;
• сув таъминоти ва оқова сув тизимларини реконструкция қилиш — 19,2 миллион доллар;
• қаттиқ маиший чиқиндиларни бошқариш — 6,5 миллион доллар;
• институционал салоҳиятни ошириш ва ривожлантириш — 6 миллион доллар;
• молиявий харажатлар ва бошқа тўловлар — 3,1 миллион доллар;
Лойиҳани амалга ошириладиган ҳудудлар: Жиззах шаҳри, Хива шаҳри, Сирдарё вилоятининг Янгиер шаҳри ва Ховос тумани.
Ҳужжатда Хива шаҳрида янги кўп функцияли туристик марказ қуриш, учта маҳаллани ободонлаштириш, Жиззах шаҳрида сув таъминоти ва канализация тизимини реконструкция қилиш режалаштирилган.
Шунингдек, Ховос туманида қаттиқ маиший чиқиндиларни ташиш станциясини қуриш режалаштирилган.