Аввалроқ, блогер Никита Макаренко ўзининг Telegram-каналида Тошкентнинг Мирзо Улуғбек туманидаги поликлиника ҳудудини тозалаш ишлари олиб борилаётган тиббиёт ходимлари тасвирланган "Ўзбекистонда шифокор тақдири" деб номланган суратни эълон қилди.
Камбағалликни қисқартириш ва бандлик вазирлиги хабарига кўра, мақолада кўрсатилган жараён жорий йилнинг 13 апрель санасида тиббиёт муассасаси ҳудудида бўлган. Бунда шифохона биносининг кириш эшиги ойналари аёллар томонидан тозаланаётгани акс этган.
Мазкур ҳолат бўйича шифохона бош шифокори ва ходимларидан тушунтириш хатлари олинган.
Бунда муассасанинг кичик тиббий ходимлари (санитарка) томонидан ҳар куни тозалаш ишлари олиб борилиши, ушбу ишлар тўғридан-тўғри кичик тиббий ходимларнинг функционал вазифасига кириши кўрсатилган. Шунингдек, тушунтириш хатларида ходимларни ўз хизмат вазифаларидан бошқа ишларни ҳамда иш вақтидан ташқари юмушларни бажаришга топшириқ ва буйруқлар қабул қилинмагани акс этган.
Меҳнат кодексининг 176-моддасига кўра, ходимнинг мажбуриятлари ички тартиб-қоидаларда, интизом тўғрисидаги низом ва низомларда, корхонада қабул қилинган маҳаллий ҳужжатларда (жамоа шартномалари, йўриқномалари ва бошқалар) аниқ белгиланган.
Тасдиқланган хизмат вазифаларида шифохонада тозалаш ишлари айнан кичик тиббий ходимининг функционал вазифасига кириши кўрсатилган.
Бундан ташқари, Санитария қоидалари ва меъёрларининг 3-иловаси билан тасдиқланган талабларда ҳам кичик тиббий ходимлар томонидан бириктирилган бино ичи ва ташқи деворлари, ойналари, поллари, кафеллари ҳамда плинтусларини тозалаш ишлари амалга оширилиши белгиланган.