Ўзбекистонда талабаларга ОТМ раҳбари томонидан берилган сертификат асосида мутахассислиги бўйича иккинчи курсдан бошлаб ишлашга рухсат берилиши мумкин. Бу бўйича Вазирлар Маҳкамаси тегишли қонун лойиҳасини муҳокамага қўйди.
Унга кўра, олий таълим муассасалари талабаларини иккинчи курсдан (айрим таълим йўналишларида иккинчи курсдан кейинги курслардан) бошлаб олий таълим муассасаси раҳбари томонидан берилган сертификат асосида мутахассислиги бўйича ўқишдан бўш вақтида ишлашига рухсат этилади.
Қайд этилишича, ҳақ тўланадиган ишлаб чиқариш амалиёти ва ҳақ тўланадиган стажировка ўтаётган талабаларни ишга қабул қилишда сертификат талаб қилинмайди. Талабаларни сертификат асосида мутахассислиги бўйича ишлашига фақат олий таълим муассасасида ўқиётган даврида рухсат этилади.
Лойиҳага кўра, Олий таълим, фан ва инновациялар вазирлиги икки ой муддатда талабаларини мутахассислиги бўйича ишлашига рухсат этувчи сертификат намунасини ишлаб чиқади ва тасдиқлайди.