Конституциянинг янги таҳриридаги 23-моддасининг биринчи қисмида Ўзбекистон ўз ҳудудида ва унинг чегарасидан ташқарида ҳам ўз фуқароларини ҳимоя қилишни кафолатлайди, деб белгиланган. ЖИДУ доценти, Истиқболли халқаро тадқиқотлар институти етакчи тадқиқотчиси Рустам Маҳмудов мазкур нормани шарҳлаб берди.
Унинг қайд этишича, бу масаланинг долзарблиги миллионлаб ватандошларнинг хорижда эканлиги ва меҳнат қилаётгани билан изоҳланади.
Мавжуд статистик маълумотларга кўра, 2022 йилда уларнинг сони 2,35 миллиондан ошди.
Уларнинг Ўзбекистон иқтисодиётига қўшган ҳиссасини алоҳида таъкидлаб ўтиш лозимдир. 2022 йилда ўзига хос рекорд ўрнатилди. Ўзбекистонга 16,9 млрд доллар жўнатилди, бу 2021 йилга нисбатан 2,1 баробар кўпдир.
Шу билан бирга, узоқ йиллар давомида хорижда меҳнат қилаётган фуқаролар давлат томонидан тегишли ҳимоя ва қўллаб-қувватлашдан маҳрум эдилар. Вазият фақат 2016 йилнинг иккинчи ярмида, Ўзбекистонда ислоҳотлар бошланиши билан кескин ўзгара бошлади.
Бандлик ва меҳнат муносабатлари вазирлиги ҳузуридаги Ташқи меҳнат миграцияси агентлигининг Россия, Туркия ва Қозоғистон ҳудудларида ваколатхона институти жорий этилди.
Ваколатхонанинг вазифаси хорижда меҳнат қилаётган Ўзбекистон фуқароларининг ҳуқуқ ва манфаатларини ҳимоя қилиш, хорижда бўлган вақтида зўравонлик, мажбурий меҳнат ва камситишларга дучор бўлган, тан жароҳати олган, оғир касал бўлиб қолган ўзларини қийин молиявий вазиятда, шахсини тасдиқловчи ҳужжатларсиз ёки нақд пулсиз қолган ватандошларга ёрдам кўрсатишдан иборат.
Ана шундай қўллаб-қувватлаш чора-тадбирлари орқали инсонда ватанпарварлик туйғуси, ўз истеъдоди, куч ва имкониятларини ўз юрти равнақи учун сармоя қилишга интилиши янада кучайди.