Европа тикланиш ва тараққиёт банки “Abu Dhabi Future Energy Company” номи билан машҳур Masdar компанияси учун Ўзбекистонда умумий ўрнатилган қуввати деярли 900 МВт бўлган учта янги қуёш станциясини қуриш учун 205 миллион долларлик молиялаштириш пакетини шакллантирди.
Лойиҳалар Осиё тараққиёт банки (ОТБ), Осиё инфратузилма инвестиция банки (АИИБ) ва Европа инвестиция банки (ЭИБ) томонидан биргаликда молиялаштирилиши кутилмоқда.
Улар Нур-Жиззах (Жиззах вилоятида, номинал қуввати 220 МВт), «Нур-Самарқанд» (Самарқанд вилоятида, номинал қуввати 220 МВт) ва «Нур-Шеробод» (Сурхондарё вилоятида, номинал қуввати 457 МВт) фотоэлектр қуёш электр станцияларини қуриш ва фойдаланишга топширилишини қўллаб-қувватлашга қаратилган.
Станциялар ишга туширилгандан сўнг умумий электр энергияси ишлаб чиқариш ҳажмини 2200 ГВт/гача ошириш, Ўзбекистондаги 1 миллиондан ортиқ хонадонни электр энергияси билан таъминлаш, атмосферага йиллик углерод чиқиндиларини 1 миллион 223,3 минг тоннага камайтириш кутилмоқда.
Таъкидланишича, ушбу лойиҳаларни қўллаб-қувватлаш мақсадида юқоридаги кредитларга қўшимча равишда ЕТТБ Masdar кафолати билан 78 миллион долларгача бўлган учта револьвер кредит линиясини тақдим этади.
«Лойиҳалар ЕТТБ ва Ўзбекистон ҳукуматининг ҳамкорликдаги фаолияти маҳсулига айланган узоқ муддатли декарбонизация стратегиясини амалга оширишга хизмат қилмоқда. Стратегия 2050 йилгача энергетика соҳасида углерод нейтраллигига эришиш режаларини қўллаб-қувватлашга қаратилган», — дейилади хабарда.