Самарқанд шаҳар Буюк Ипак Йўли кўчаси 65-уйнинг олдида ўрнатилган АТ "Туронбанк" Самарқанд вилоят филиалига тегишли бўлган банкоматни ўмармоқчи бўлган шахслар қўлга олинди. Бу ҳақда вилоят ИИБ Aхборот хизмати хабар берди.
Маълум қилинишича, 3 нафар номаълум шахс жорий йилнинг 31 март куни тунги соат 03:00да юзларини тиббий ниқоб билан беркитган ҳолда мазкур жиноятни содир этган.
Фуқароларга пластик карталаридаги пулларини нақд қилиб бериш учун хизмат кўрсатувчи ушбу банкомат шохобчасига келиб, улар банкоматни электр қувватидан узган. Бузиш йўли билан банкомат ичида бўлган 323.290.000 сўм нақд пулларни яширин равишда талон-торож қилмоқчи бўлган.
Лекин банкоматнинг тармоқдан узилганлиги ҳақидаги сигнали ишга тушиб кетган. Натижада Самарқанд шаҳар қўриқлаш бўлимига берилган огоҳлантирувчи чақирув асосида ходимлар воқеа жойига етиб келган. 3 нафар фуқаро ҳодиса жойидан яширинган бўлишига қарамасдан, Самарқанд шаҳри ИИО ФМБ ходимларининг тезкор қидирув-суриштирув ишлари натижасида уларнинг барчаси қўлга олинган.
Ҳозирда ҳолат юзасидан жиноят иши қўзғатилиб, тергов ҳаракатлари олиб борилмоқда.