Бугун, 24 март куни Тошкент метрополитенининг Қўйлиқ-Сергели йўналишидаги бешта янги бекатида поездлар синов режимида ҳаракатлана бошлади, деб хабар қилди Транспорт вазирлиги матбуот хизмати.
Тадбирда Транспорт вазирлиги мутасаддилари, пойтахт метрополитени, «Боштранслойиҳа» АЖ ва «Ўзбекистон темир йўллари» АЖ раҳбарлари иштирок этди.
Айни пайтда «Қўйлиқ-Қурувчилар» метро бекатининг 8,5 километр узунликдаги бешта бекатни ўз ичига олган ер усти ҳалқа линияси участкасида ишлар ниҳоясига етказилди.
Узунлиги 3,8 километр бўлган иккита станцияни ўз ичига олган «Қурувчилар-Қипчоқ» участкасида қурилиш ишлари жадал суръатларда олиб борилмоқда.
Қайд этилишича, ушбу йўналишда йўловчи ташиш йўлга қўйилиши натижасида техник синовлардан сўнг кунига 40 мингга яқин йўловчига хизмат кўрсатилади.
