Бугун, 22 март Ўзбекистонда Маҳалла тизими ходимлари куни нишонланади. Шавкат Мирзиёев ушбу қутлуғ кун муносабати билан бир қатор фуқароларни орден ва медаллар билан тақдирлади, шунингдек, барча маҳалла тизими ходимлари ва фаолларини байрам билан табриклади. Бу ҳақда президент матбуот хизмати хабар берди.
Давлат раҳбари табригида кейинги йилларда ўзини ўзи бошқаришнинг ўзига хос тизими сифатида маҳалла институтининг нуфузини ошириш, уни «халқ виждони»га айлантириш, унинг ҳуқуқ ва ваколатлари, моддий-техник базаси ва кадрлар салоҳиятини мустаҳкамлаш, ижтимоий-маданий ва маънавиятини янада кенгайтиришга қаратилган таъсирчан ишлар амалга оширилаётганини таъкидлади.
Маҳаллаларни ободонлаштириш, инфратузилмасини ривожлантириш борасида амалга оширилаётган бунёдкорлик ишлари самарасида юрт қиёфаси тубдан ўзгариб, аҳоли турмуш сифати ва маданияти юксалиб бораётгани таъкидланди.
Шавкат Мирзиёев ўтган йили маҳаллаларни янгилаш учун 27 триллион сўм ажратилганини, бунинг натижасида 4 мингдан ортиқ маҳаллалар ўзгартирилганини айтди. Уларда юзлаб мактаблар, болалар боғчалари, тиббиёт муассасалари қурилди ва таъмирланди, электр энергияси, ичимлик суви, табиий газ, иссиқлик таъминоти, автомобиль транспорти тизими фаолияти яхшиланди.
Маълум қилинишича, 2023 йил – «Инсон ғамхўрлиги ва сифатли таълим йили»да ушбу мақсадлар учун 30 триллион сўм маблағ йўналтирилади, бунинг натижасида 5 минг 800 та маҳалла ўзгаради.
Президент маҳалла фуқаролар йиғинларига ўз туманларидаги халқ депутатлари Кенгашлари сессияларида таклифлар киритиш, қарорлар лойиҳаларини ишлаб чиқиш ва муҳокама қилишда иштирок этиш ҳуқуқини таъминлашни таклиф қилди. Шунингдек, аҳолини энг кўп ўйлантираётган ижтимоий муаммоларни аниқлаш ва бартараф этиш мақсадида маҳалла раиси томонидан муҳокамалар ўтказиш, ҳар ойда маҳалла фуқаролар йиғинида тегишли давлат органлари ва ташкилотлари раҳбарларининг ахборотини эшитиш амалиёти жорий этилди. «Маҳалла назорати» ва «маҳалла раисининг талабномаси» институтлари ташкил этилади.
Шавкат Мирзиёев мамлакатда маҳалланинг фуқаролик жамияти таянчига, чинакам оммабоп тузилмага айланиши учун барча ишлар қилинишини таъкидлади.