Ходимларни байрам (ишланмайдиган) кунлари иш берувчининг фармойиши бўйича ишга жалб этишга фақатгина жамоа шартномасида, агар у тузилмаган бўлса, иш берувчи томонидан касаба уюшмаси қўмитаси ёки ходимларнинг бошқа вакиллик органи билан келишиб белгиланган асослар бўйича йўл қўйилади. Бу ҳақда Адлия вазирлиги маълум қилди.
Ишлаб чиқариш-техника шароитлари ва бошқа шароитларга кўра ишни тўхтатиб туриш мумкин бўлмаган жойларда, аҳолига хизмат кўрсатиш зарурати бўлган ишларда, шунингдек, кечиктириб бўлмайдиган таъмирлаш ва юк ортиш-тушириш ишларида байрам (ишланмайдиган) кунлари ишлашга йўл қўйилади.
"Дам олиш кунлари ва байрам кунларидаги ишлар учун камида икки ҳисса миқдорида ҳақ тўланади", - дейилади хабарда.
Президент фармонига асосан, Наврўз байрами муносабати билан дам олиш кунлари қуйидагича белгиланган:
— 5 кунлик иш ҳафтасида ишлайдиган ходимлар 5 кун;
— 6 кунлик иш ҳафтасида ишлайдиган ходимлар 4 кун дам олишади.
Яъни:
— 18 март, шанба — 5 кунликларга дам олиш, 6 кунликларга иш куни;
— 19 март, якшанба — барча учун дам олиш куни;
— 20 март, душанба — 5 кунликлар учун 11 март шанбадан кўчирилган дам олиш куни, 6 кунликларга қўшимча дам олиш куни;
— 21 март, сешанба - Наврўз байрами, барчага дам олиш куни;
— 22 март, чоршанба — 5 кунликлар учун 25 март шанбадан кўчирилган дам олиш куни, 6 кунликларга қўшимча дам олиш куни.
Эслатиб ўтамиз, 23 март, пайшанба — барча учун иш куни.