Қашқадарёда деярли 1 тонна истеъмолга яроқсиз гўштни олиб кетаётган шахс ушланди

Жорий йилнинг 15 март куни соат 21:10 атрофида «Қарши – Самарқанд» йўналишида ҳаракатланиб келган Cobalt автомашинаси Қашқадарё вилояти Китоб туманида жойлашган «Мингчинор» мунтазам ЙПХ масканида тўхтатилди. Автомобиль салон ва юкхонаси кўздан кечирилганда келиб чиқиши номаълум ҳайвонга тегишли бўлган, ҳеч қандай ҳужжатларсиз 900 кг гўшт маҳсулоти борлиги аниқланди. Бу ҳақда Қашқадарё вилояти ИИББ ахборот хизмати хабар берди.
«Аниқланган гўшт вилоят «Озиқ - овқат маҳсулотлари хавфсизлиги» лабораторияси ходимлари томонидан текширувдан ўтказилганда, истеъмолга яроқсизлиги маълум бўлди», — дейилади хабарда.
Лаборатория хулосасига кўра сифатсиз гўшт маҳсулоти тегишли тартибда йўқ қилинди.
Ҳолат юзасидан ҳуқуқбузарга нисбатан МЖтКнинг 109-моддасига асосан маъмурий баённома тузилиб, тегишли жазо қўлланилди.