Жорий йилнинг 30 январь куни Россия томонидан Украина ҳудудида жанг қилган 43 ёшли Ф.Х.нинг жасади Ўзбекистонга етказилди, деб хабар бермоқда Давлат хавфсизлик хизмати.
Марҳум Қорақалпоғистоннинг Элликўл туманидан бўлган. Россияда у меҳмон ишчиси сифатида ишлаган.
Аввалроқ интернетда Украина Қуролли кучлари томонидан ушбу мамлакат ҳудудида жанг қилган гўёки икки ўзбекистонлик қўлга олингани акс этган видео тарқалган эди.
Шундан сўнг Ўзбекистоннинг Украинадаги элчихонаси тасдиқланмаган маълумотларни тарқатмасликка ва барча ҳолатларга якуний ойдинлик киритилишини кутишга чақирган.
Эслатиб ўтамиз, ЖКнинг 154-моддасига (Ёлланиш) мувофиқ, низолашаётган давлатнинг фуқароси ёки ҳарбий хизматчиси ҳисобланмаган ёхуд назорат қилиниб турган низолашаётган давлат ҳудудида доимий яшамайдиган ёки ҳеч қандай давлат томонидан қуролли кучлар таркибида расмий топшириқни бажариш ваколати берилмаган шахснинг моддий манфаатдорлик ёки бошқа бирон шахсий манфаатни кўзлаб, ўзга давлат ҳудудида ёки унинг тарафини олиб қуролли тўқнашувда ёхуд ҳарбий ҳаракатларда қатнашиш учун ёлланиш беш йилдан ўн йилгача озодликдан маҳрум қилиш билан жазоланади.