Uzbekistan Airways'нинг Тошкентдан Москвага учаётган HY-601 рейси бортида 210 нафар йўловчи Внуково аэропортига қўнганидан кейин тўрт соат давомида самолётда қолиб кетди, деб хабар бермоқда Baza Telegram-канали.
Маълум қилинишича, самолёт бортида йўловчилар ўртасида жанжал келиб чиққан.
"Тошкентдан ҳавога кўтарилган самолёт Домодедовога қўниши керак эди. Аэропорт бўйлаб икки айланиб ўтиб, у Внуковога йўналтирилди. Расмий сабаб — об-ҳаво. Соат 21:38 да қўнгач, йўловчилар самолётга қамаб қўйилган. Аэропорт негадир одамларни ташиш учун автобус ажратишдан бош тортди. Бир неча соатдан кейин бортда муштлашув бошланди. Қизлардан бири мазаси қочди. Мен шифокорларни чақиришим керак эди ”, - дейилади хабарда.
Парвоз йўловчиларидан бирининг UzNews.uz'га маълум қилишича, самолёт қўниши вақтида учувчилар Домодедово аэропортига икки марта қўнишга уринишган, бироқ 40 дақиқадан сўнг самолёт Внуковога қўнган. Экипаж командири самолёт учишга тайёрлиги ҳақида бир неча бор хабар берган, бу эса йўловчиларнинг ҳам кулгисини, ҳам ғазабини келтириб чиқарган.
"Биз самолётда тўрт соатдан кўпроқ вақт ўтирдик. Бу вақт ичида на учувчилардан, на стюардессалардан вазият ҳақида аниқ изоҳ берилмади. Учувчилар шунчаки йўловчилар билан гаплашишдан бош тортдилар. Домодедово аэропорти барча самолётлар нормал қўнаётганини тасдиқлади ва HY-601 нима учун қўнмаганини тушунмаяпти. Барча самолётларнинг мунтазам қўниши Flightradar24 томонидан ҳам кўрсатилган. Внуково йўловчиларни қабул қилишга тайёр эди, лекин капитан уларни ташқарига чиқаришга рухсат бермади”, - деди воқеа гувоҳи.
Йўловчилар ва уларнинг яқинлари умидсизликка тушиб, йўловчиларни қўйиб юбориш илтимоси билан Россия полицияси, Федерал ҳаво транспорти агентлиги, Россия ташқи ишлар вазирлигига қўнғироқ қила бошлашган. Самолётга полиция ҳам чақирилган.
"Улар йўловчиларни ушлаб турмаслик кераклигини айтишди, лекин улар ҳеч нарса қила олмайдилар. Шунингдек, шу вақт ичида одамларнинг соғлиғи ёмон бўлгани учун бортга етти нафар шифокор келди", - деди йўловчи.
Воқеа сабаблари юзасидан Uzbekistan Airways вакилларининг расмий изоҳини кутамиз.