Ташқи ишлар вазири вазифасини бажарувчи Бахтиёр Саидов зилзиладан жабр кўрган Ҳатай вилоятининг Овакент қишлоғига етиб келди. Бу ҳақда у ўзининг Telegram-каналида ёзган.
Аввал хабар қилинганидек, ушбу қишлоқда 10 мингдан ортиқ ўзбек истиқомат қилади. Зилзиладан кейинги деярли дастлабки кунларданоқ бу ерда ўзбекистонлик қутқарувчилар ишламоқда. Шунингдек, Ўзбекистон Мудофаа вазирлигининг кўчма госпитали ўрнатилди.
Ташриф давомида Бахтиёр Саидов маҳаллий аҳолини қўллаб-қувватлаш учун келган юртдошларига миннатдорчилик билдирди. Вазир Газиантепда Туркия ташқи ишлар вазири Мевлут Чавушўғли билан ҳам учрашиб, кўплаб қурбонлар муносабати билан унга ҳамдардлик билдирди.
"Оқибатлари қалбимизда чуқур яра қолдирган вайронагарчиликлар муносабати билан Ўзбекистон президенти ва халқи номидан самимий ҳамдардлик билдирдим. Биз Туркия билан ушбу оғир дамда биргамиз", - деди Ўзбекистон ТИВ раҳбари.
Маълумот учун, Ўзбекистоннинг Хатайдаги кўчма шифохонаси 2 мингга яқин жабрланганларга ёрдам кўрсатди. Фавқулодда вазиятлар вазирлиги вайроналар остидан 30 дан ортиқ одамни қутқариб олди.
