Аввалроқ, Тошкент шаҳри Яшнобод туманида аёл маст ҳолатдаги эркак ҳамкасби билан ўзаро жанжаллашиб қолиб, уни пичоқлаб ўлдириб қўйганлиги ҳақида хабар берган эдик.
Маълум қилинишича, ҳодиса жорий йилнинг 4 сентябрь куни соат 00:30 атрофида Яшнобод тумани Торариқ кўчасида жойлашган умумий овқатланиш жойида содир бўлган.
Судланувчи 26 ёшли аёл ошхонада официант бўлиб ишлаган ва оилавий шароити туфайли иш кунлари ошхонада яшаб келган.
Судланувчи ва жабрланувчи аввалдан таниш бўлиб, улар маълум вақт шаръий никоҳда ҳам бўлган. Иш жараёнида жабрланувчи эркак М.C. аёлни бошқа эркаклардан рашк қилиб, маст ҳолатда доимий келишмовчиликларни келтириб чиқарган.
Аёлнинг сўзларига кўра, жабрланувчи уни нафақат урган, балки қаршилик кўрсатишига қарамасдан тегажоғлик ҳам қилган. Бундай ҳолатлардан сўнг аёл у ердан ишдан кетган, лекин бироз вақтдан сўнг яна аёлни бошлиқлари шу ошхонага ишлаш учун чақирган.
Жиноят содир этилган кунда жабрланувчи яна ичиб келиб, аёлга тегажоғлик қилган. Аёл уни қўрқитиш мақсадида қўлига ошхона пичоғини олиб, бехосдан унга пичоқ тиқиб олади.
Натижада, М.С. олган тан жароҳати билан шифохонага олиб кетилаётган вақтда вафот этган.
Ҳолат юзасидан суд иши ЖИБ Яшнобод туман судида кўриб чиқилди.
Унга кўра, судланувчи ЖКнинг 104-моддаси 3-қисми "д" бандида назарда тутилган жиноятни содир этганликда айбдор деб топилиб, ЖКнинг 57-моддасини қўллаб, 6 йил-у 6 ой муддатга озодликдан маҳрум қилиш жазоси тайинланди.