Ахборот технологиялари ва коммуникацияларини ривожлантириш вазири лавозимида ишлаб келган Шуҳрат Содиқов Бош вазир котибияти раҳбари ўринбосари этиб тайинланди. Бу ҳақда ЎзА хабар бермоқда.
Шуҳрат Содиқов 2018 йил августидан 2021 йил ноябригача Ахборот технологияларини ривожлантириш вазирлигини бошқарган ва ижтимоий тармоқларга (Telegram, Facebook, Instagram, YouTube ва "Одноклассники") киришни чеклаб қўйгани учун ўз лавозимидан озод этилган эди. Кейинроқ Шавкат Мирзиёевнинг фармойишига кўра, ижтимоий тармоқлар иши тикланди.
Шунингдек, «Ўзкомназорат» Ахборот ва телекоммуникация соҳасида назорат бўйича давлат инспекцияси бошлиғи Ғолибшер Зияев «ўйлаб топилган хатти-ҳаракатлари» учун эгаллаб турган лавозимидан озод этилган эди.