Қашқадарё вилояти ҳуқуқ-тартибот идоралари ходимлари томонидан ўтказилган тезкор тадбир давомида Яккабоғ тумани ҳокимлиги ходими маҳаллий қурилиш ташкилоти вакилидан 370 миллион сўм олаётган вақтда қўлга олинди, дея хабар бермоқда ЎзА.
Маълум бўлишича, амалдор иккита боғчани капитал таъмирлаш лойиҳаси бўйича 5 миллиард 250 миллион сўмлик тендерда ғолиб чиқишга ёрдам беришни ваъда берган. Бунинг эвазига у ушбу сумманинг 7 фоизини талаб қилган.
Шунингдек, тезкор тадбир давомида ушбу жиноятга алоқадор бўлган Яккабоғ тумани мактабгача таълим бўлими ходими қўлга олинди.
Ҳозирда юқоридаги шахсларга нисбатан ЖКнинг тегишли моддалари билан жиноят иши қўзғатилиб, тергов ҳаракатлари олиб борилмоқда.